Новини во најголемата македонска винарија! Кој ќе го води Надзорниот одбор на „Тиквеш“?

Добивај вести на Viber

Корпоративната пракса во Македонија во овие триесет и кусур години речиси и да не памети пример во кој таткото е на позиција генерален менаџер и прв оперативец, а синот е на позиција надзор и контрола над таткото. Вообичаено е обратно. Потегот на таткото и синот Јаневски е авангарден, а често промените и покрај ризиците водат кон нов квалитет. Примерот на „Тиквеш“ ќе покаже дали како и многупати досега Јаневски знаеле да носат одлуки кои во перспектива создавале нова вредност

Јане Јаневски, е назначен за претседател на Надзорниот одбор на најголемата македонска винарска визба „Тиквеш“ од Кавадарци. Јане е син на Светозар Јаневски, на местото претстедател на Надзорниот одбор доаѓа од позиција член на Управниот одбор на истата компанија. Со винарската визба раководи Светозар Јаневски, дологодишен успешен директор и косопственик на Пивара Скопје, кој по нејзината продажба на „Кока Кола“ го превзеде кавадаречки „Тиквеш“ и успешно раководи со таа голема кавадаречка компанија дваесетина години досега.

Сега, поточно од вчера, имаме ситуација во која синот Јане ќе го контролира и одобрува работењето на неговиот тактко Свето. Тоа е ретка пракса во нашата триесет годишна корпоративна историја во која вообичаено е таткото да го отстапи местото на главен оперативен менаџер или извршен директор на синот или ќерката, а тој да продолжи да биде главен во надзорот на работењето на компанијата. Такви процеси имавме на пример кај „Фершпед“ и кај „Гранит“.

Од друга страна пак, Јане Јаневски е претседател на Управниот одбор на скопската трговска компанија „Аутомакедонија“. И од тој аспект не е можно исто лице да биде на претседателско место во два управни одбори во две компании.

Како и да е, таткото и синот одлучиле потешката работа односно оперативното управување со гигантот „Тиквеш“ да продолжи да го работи таткото, а синот да ја води „Аутомакедонија“.

„Тиквеш“ е македонската винска гордост и меѓународно најпрепознатлив наш бренд во оваа индустрија. Минатата година „Тиквеш“ е убедливо најголемиот производител на вино и ракија во Македонија. Неговиот приход надмина 60 милиони евра, а годината ја заврши со добивка од 4,5 милиони евра. „Тиквеш“ лани вработуваше над 200 лица. Вреди да се истакне тоа што приходите на „Тиквеш“ растат три години по ред. Ист е трендот и кај добивката на компанијата. 

Р.Ф.